姚正菁國際時裝騷擺烏龍

姚正菁國際時裝騷擺烏龍



姚正菁身穿紫色泰服行騷

姚正菁國際時裝騷擺烏龍

林寶玉早前帶姚正菁到米蘭時裝周睇騷，日前菁菁網上貼圖爆出踏上當地天橋做模特兒，呢次復出第一擊認真威水！

姚正菁為泰國品牌在米蘭時裝周做模特兒，為了今次表演刻意減磅，用最佳狀態出場。當日她身穿紫色泰國民族服亮相，不少觀眾以為她是泰國華僑。身為“模特兒”界新人，姚正菁笑稱拉高全騷“平均年齡”：“我要多謝經理人林寶玉同埋主辦方肯畀機會我嘗試，我見到身邊好多模特兒都係年輕嘅小妹妹，得我一個係呢個年紀嘅新人，難免都會有啲緊張，後來主辦方同我講，我散發嘅女人味係後生Model（模特兒）搵唔到嘅，所以證明‘發夢’同年紀無關，最緊要把握每一次機會。”

經過今次後，姚正菁萌生進軍時裝界的念頭：“我今次真係好興奮，想喺時裝界繼續發展，因為我覺得冇嘢係冇可能。今次行騷我都擺咗個大烏龍，因為彩排嘅場地比會場細，我一路掛住‘表情管理’冇細心聽書，原來會場嘅Runway有成一百五十米長，我行咗一半就已經掉頭走，真係超級尷尬！呢次算係我一個小遺憾，希望未來有其他機會可以再行騷，完完整整咁樣行晒成個天橋。”