陳曉華曾幻想開花店

陳曉華曾幻想開花店



陳曉華自認冇膽營商

《死有對證》劇組出席活動

阮浩棕宣傳新劇

陳熹潼談擇偶條件

允許男友同異性煲電話粥

陳曉華曾幻想開花店

陳曉華(Hera)、馬貫東、阮浩棕、陳熹潼及王菲等，日前出席無線劇集《死有對證》宣傳活動，現場眾人重演劇中的掌摑場口外，Hera與馬貫東扮借位錫錫，不過Hera就要用鮮花摭面。現場播出馬貫東因女友王菲出軌而提出分手的片段，他笑說：“冇得接受，都可以分手咗先。”受訪時被問到若現實中遇到同樣事情會如何，他説：“冇得傾！”

記者問馬貫東有冇親身經歷，他說：“我知嘅就冇，（咁你自己有冇試過？）我肯定冇啦。我唔得嘅，我唔可以出軌嘅，聽過都想鬧人。”Hera則說會視乎對方的解釋而定，細個都真係會聽對方解釋，但長大後就唔好聽太多解釋。問到男友同異性傾電話得唔得，她說：“都唔會鬧嘅，傾多啲啦，我而家係鼓勵嘅，你傾啊、傾啊、傾啊，即係如果有朋友話鍾意同啲異性傾啊，或者可能點樣，我都覺得可能有感情煩惱，鼓勵做咗先，做咗之後你就會知自己想點樣啦。”

談到她在台上收到花很開心，Hera說很喜愛鮮花：“都鍾意收花，我自己成日買花，之前曾學過插花，有幻想過開花店。（唔實行？）依家忙拍劇，加上未敢踏出第一步。”身旁經營寵物美容生意的馬貫東即鼓勵她：“唔踏出第一步就永遠唔會有你嘅花店。”又教她可先找合心水舖位開始，笑言可以考慮在他的寵物美容店旁邊開，他可順便幫她看舖。

日前被爆患有重度抑鬱症及B型人格特質的唐寧，指她移居新西蘭期間曾出現一連串極端操縱性行為，近日回港並曾參與其寵物美容課程，馬貫東指對方上課期間並沒有任何異樣：“係蔣祖曼介紹，話希望佢可以了解寵物美容嘅知識，嗰次第一次見，見咗三、四個鐘，係好正常嘅學生咁。”

陳熹潼活動上扮掌摑劉頌鵬時入木三分，她笑指因讀演藝學院時時有幾堂係專門教掌摑，現實中她亦有學功夫，有學過大聖劈掛。她說學武功純粹為了自衛，不會隨便打人。她早前訪問中自爆已離婚三年，她坦言現時已收拾心情。問到是否已準備好接受新的感情，她笑說：“順其自然，唔抗拒，（擇偶條件？）錫屋企人嘅暖男、同我一樣鍾意宅喺屋企。（圈內人？）希望圈外人，我自己工作時間都咁唔定，若果對方都係嘅話就冇乜時間見面，我鍾意黐身。”