游泳冷知識 你又識唔識？
|
|
| 游泳冷知識你又識唔識？ 游泳項目表面上睇好似好直接——邊個游得快就邊個贏，其實背後隱藏咗好多連經常睇比賽嘅人都未必知嘅冷知識。由泳池嘅黑科技到選手嘅生理反應，你又知道幾多？ 泳池入面晉級成績最好的泳手永遠安排在中間線道，而兩側最近池邊的線道被視為“地獄線”，因為泳手衝刺產生的浪撞到池邊會反彈返轉頭，形成巨大阻力。雖然現今游泳比賽各線道間都有膠珠分隔，這些一粒粒好似齒輪的膠珠其實係會轉動的消浪器，透過旋轉吸收同分散水流的能量，減低水浪對隔壁泳手的干擾，不過最外側線道仍最受影響。 剃毛唔係貪靚 泳手雖在水中比賽，不過游泳其實是一項高強度的有氧兼無氧運動，一樣會出汗。根據研究，泳手在一小時的高強度訓練，平均可排出大約一公升汗水。 好多泳手比賽時都會戴兩頂泳帽，唔係迷信而是另有原因。內層一般會戴乳膠泳帽，用以固定頭髮；外層則用較硬的矽膠泳帽，將泳帽表面撐得極平滑以減少水阻。另外會將泳鏡帶夾在中間，防止跳水或轉身時被水流衝脫。 唔少頂級男泳手都會在比賽全身剃毛，當然唔係貪靚，最重要是刮走皮膚上老化的角質，令皮膚的神經末梢變得極敏感，入水後可更清晰感受水流的壓力（水感），微調划水角度。
|