鄭則仕宣傳扶手電梯安全

鄭則仕宣傳扶手電梯安全



化身“微臣”的鄭則仕

Kent哥宣傳扶手電梯安全

鄭則仕現身港鐵站拍廣告

鄭則仕輕鬆完成跑步鏡頭

延續“則仕DoIt”精神

鄭則仕宣傳扶手電梯安全

鄭則仕（Kent哥）日前現身港鐵南昌站拍攝廣告，延續今年參與馬拉松賽事後獲網民熱捧嘅“則仕DoIt”精神，宣揚注意扶手電梯安全訊息。

呢晚Kent哥一身運動造型上陣，雖然深宵時份拍攝，依然非常專業，中氣十足兼輕鬆完成跑步情節，不時睇重播，盼以最佳狀態示人。提到跑步，Kent哥開心分享點滴：“依家跑咗步一年幾，體重上冇瘦到但又冇肥到，因為以前好多脂肪，而家多咗啲肌肉。所以跑步其實令人健康嘅啫，唔好用減肥個角度去跑步，為自己健康跑步都好值得。”

“則仕DoIt”成為網民大熱，Kent哥感激網友鼓勵，成為自己跑步嘅最大動力：“多謝大家，做呢個運動可以令自己身體健康，點知做完之後有咁多額外嘅回報，呢個‘則士DoIt’令到我咁受注目，非常感謝大家。”

雖然比起以前變得更身手敏捷，鄭則仕表示自己一向注意乘搭扶手電梯嘅安全，表示長者跌一跌會好大鑊：“唔好話老人家搭電梯腳步浮浮要扶穩呀，年輕人都要扶穩！因為安全係為咗自己，萬一失手碌落去，唔理你幾多歲，都會帶嚟好大傷害；所以由小朋友到老友記，都需要注意安全，呢個安全係保障我哋自己呀！所以搭扶手電梯要扶定定、企定定，帶住重嘢就要去搭。”

呢日廣告Kent哥除了以跑步造型現身外，深受網民歡迎的“微臣”亦以彩蛋形式登場，回饋網民多年來嘅熱愛：“係呀，呢個莫名其妙。‘微臣先行告退’當年拍呢句係畀人鬧?，當年對住苑瓊丹講，咁都冇畀人拉出去斬！諗都諗唔到依家呢句說話成為潮語，微臣多謝各位網民畀面。”

提到近期人氣急升，Kent哥笑言仲有戲癮想多拍戲：“拍戲有錢?嘛，唔係咩？哈哈！無錢邊個拍呀？其實拍戲主要就講你的能力同市場，有人搵、有能力咪繼續做落去。開工係開心口架，成班人喺度圍住望我。”